A Historia de Lares

Os inicios

A idea primixenia do que un día chegaría a ser Lares comezou na vila de Cangas durante os anos 50.

Dúas mulleres, nai e filla, alleas aos convencionalismos da época, poñen en aluguer varias habitacións da súa casa familiar, que ocupan indistintamente traballadores ou os primeiros veraneantes. Fina, que medra entre estes novos veciños, será quen, nos vindeiros anos, atenderá o negocio.50s

Medrando

Fina e José van un paso máis alá e constrúen os que serán os primeiros pisos adicados ao aluguer en Cangas, e que ocupan principalmente familias da vila (algunhas viviron alí durante décadas).  Anos máis tarde, ás vivendas de Cangas engádense varias edificacións no rural cangués: en Liméns e O Hío.

80, 90s

Cintia toma o relevo

O negocio familiar adquire forma de empresa (Basalnor S.L.), producíndose case simultáneamente o relevo xeracional na xerencia. Cintia dirixe a empresa na procura da profesionalización e modernización. Nestes tempos xurde a nosa primeira e primitiva páxina web (herbas.es), con fotos feitas cunha cámara compacta.

Sole e Diego

A nova dinámica da empresa precisa de máis recursos humanos: Sole e Diego son os primeiros traballadores da pequena oficina en Hío, nun tempo no que Basalnor centra os seus esforzos na rehabilitación dos inmobles.

Jacobo e máis renovación

A profunda transformación levada a cabo en Basalnor S.L. por este pequeno equipo de traballo, cheo de ilusión, terá por fin tamén reflexo exterior grazas á colaboración con Jacobo: estreamos Alugueiro Lares, novo nome comercial e, por fin, unha web de maior calidade, con deseño, fotos e contidos feitos por nós, onde amosar como merecían as nosas vivendas. Por primeira vez, nós fomos Lares.

E así, Lares Inmobiliaria...

Pensándoo ben, tiñamos a experiencia de anos administrando os nosos alugueres, e tanto inquilinos como propietarios apreciaban o noso xeito de facer as cousas. E así, case espontáneamente, xurdiu a idea de adentrarse na xestión inmobiliaria. A dura crise económica, que afectaba especialmente ao sector inmobiliario, non nos botou para atrás, seguiríamos apostando polo aluguer, simplemente faríamos para outros o que sabíamos facer para nós.

...abre en 2010!

Así nace Lares Inmobiliaria, unha nova empresa, que os seus fundadores, Jacobo e Cintia , constrúen dende unha visión nada convencional do sector inmobiliario.

Con moita emoción e, despois de remodelar o local con axuda de Mauro Trastoy, no mes de xuño, abrimos a oficina na rúa Fonte do Galo, na que tamén atopamos espazo para o equipo de Alugueiro Lares, que seguiría traballando cos nosos inmobles.

Juanma e a web

Apenas un ano despois da súa estrea, Lares Inmobiliaria da un paso de xigante. Por unha banda, ampliamos equipo -coa incorporación de Juanma, aparellador-, conformándose un equipo de traballo interdisciplinario. E, por outra, ampliamos tamén servizos (ofrecendo inmobles á venda) e dotámonos de máis medios: estreamos programa de xestión e nova web, www.inmobiliarialares.es, que cambia a nosa forma de traballar.

Aire fresco

Lares Inmobiliaria firma o convenio de colaboración coa FUVI (Fundación Universidade de Vigo) para que os alumnos poidan facer na nosa empresa as súas prácticas curriculares e para que o seu espírito novo nos refresque cada verán.

Máis colaboracións

Levamos a cabo o proxecto colaborativo “É para ti”, no que participan, entre outros, os artistas Santi Jiménez e Mauro Trastoy, na rehabilitación dun estudo de Lares Nosos na rúa Zaragoza, en Vigo.

Chegan os vídeos

Non nos conformamos coa fotografía e lanzámonos ao vídeo para achegarvos un pouco máis á realidade.

A nosa canle de YouTube medrará con novas e diferentes fórmulas de retratar as propiedades

Casco vello renovado

Co acondicionamento do local para Emotiva Psicoloxía, Lares Nosos conclúe as obras de rehabilitación dos edificios de Fonte do Galo 5 e 7, que cambiaron drásticamente esta céntrica rúa, agora con negocios nos seus baixos comerciais: Lares, O Galo da Loli, Emotiva Psicoloxía, Fonte do Galo Rock and Roll Bar... Neste mesmo ano levamos tamén a cabo a rehabilitación da fachada da casa da Rúa Santa Baia esquina con Rúa do Sol (esa mesma onde deu comezo a historia de Lares).

Vive o Morrazo

Foi o ano no que os de Lares, xuntos,  vivimos, como nunca antes, O Morrazo.

Lares Nosos rehabilita

Rehabilitamos un dúplex no Hío, documentando todo o proceso de reforma. Será o campo de probas para novas colaboracións profesionais, pero tamén o escenario perfecto para os primeiros voos de dron e para as gravacións coa tecnoloxía Lares 360 do vindeiro ano.

Seguimos medrando

Cando se cumplen 5 anos de andadura de Lares Inmobiliaria, o noso equipo volve medrar, esta vez coa incorporación de Ana. E non podemos esquecer a chegada da nosa bicicleta, coa que desprazarnos áxilmente e sen pegada ecolóxica!

Máis reforzos

Rodrigo, que comezara as súas prácticas o verán anterior, termina os estudos e xa é un máis do equipo. E a el súmanse, tamén neste ano, Rebeca, como axente inmobiliario, e Anxo como técnico audiovisual.

A explosión tecnolóxica

No ano en que Ana, Rebeca e Sole se suman á presentación de vídeos en galego, Jacobo faise piloto autorizado de drons e Lares, despois de varias probas da tecnoloxía, publica a primeira visita virtual con tecnoloxía 360. Pero, non satisfeitos, asistimos ao Tek-Fest, onde Jacobo e Anxo intercambian coñecemento cos profesionais máis punteiros da realidade virtual.

Lares é noticia 

Os medios fanse eco das innovacións tecnolóxicas levadas a cabo por Lares. Por unha banda, o diario dixital Código Cero e Radio Galega entrevistan a Jacobo para saber máis sobre o uso do vídeo aéreo e da tecnoloxía 360 no sector inmobiliario. E por outra, Idealista, o portal inmobiliario máis recoñecido a nivel estatal, visítanos na oficina de Cangas, publicando en Idealista News unha reportaxe e entrevista a Cintia, resaltando tamén o uso das novas tecnoloxías.

Nova web e nova oficina

O "17" foi probablemente un dos anos máis importantes para nós, con fitos que marcaron o presente de Lares; A primeiros de ano chegou a nova web, lares.gal, que supuxo unha profunda renovación estética e funcional que nos levou un paso máis alá. Máis tarde, en pleno verán, mudámonos á Rúa do Sol 19, a un local do que fixemos a rehabilitación integral en pouco máis de 5 semanas, convertindoo no lugar que máis nos representa, onde podemos traballar e atendervos mellor.

E para rematar, nos últimos meses do 2017, o equipo voltou medrar coa chegada de Nicole. Así, xuntos, reunindo máis profesionais, extendemos unha visión sobre a vivenda actual que cada vez máis xente comparte.